八爺玩屏風就是不一樣

Kelvin
日期 : 2019年 10月11日

以蔗楂嘅價錢,做出燒鵝嘅味道,用來形容八爺,相信無乜人會反對吧! 

事實上,去家訪過八爺的同好,絕大多數都會讚賞佢調校出來的聲音,尤其係立體和層次感,當然,眾所週知喇叭擺位係佢嘅強項之一,但最令發燒友驚訝的莫過於佢可以用有限嘅金錢(真係稍為貴價的名線已可買起佢套機),玩出超乎想像的音效,真係令人有點酸葡萄的感覺。 

言歸正傳,得知八爺最近試玩屏風喇叭(聽講係朋友借的),佢話向難度挑戰喎;在各色各樣的喇叭設計當中,屏風算是很特別的品種,因為它前後都會發聲,聆聽環境和擺位都相當講究,玩得掂和玩唔掂,簡直係兩個世界!我以前去家訪都聽過屏風喇叭,那麼,八爺可以玩出何樣境界,我真的滿有興趣想了解和感受一下,於是馬上報名再去家訪(補課)。 

週五晚上七點上到八爺府,八爺開門,奇怪!點解無落布簾嘅?(註:八爺在玄關位置有一幅布簾,聽歌時會落簾,坐在皇帝位,視覺上很好,感覺好像置身一個正長方形的客廳之中,當然,你也不會相信那純粹是為了視覺效果罷了。) 

跟八爺已經相識幾年,也不用客氣了,自己就坐,然後馬上開始「音樂會」。

首先介紹今次嘅主角 - Magneplanar 1.7 

在Magnepan的型號中,1.7算是比較細size的了,對上還有3.7,20.7和30.7;1.7身高5呎5吋,闊19吋,三路設計,頻率響應40Hz至24kHz, 靈敏度86dB, 4 ohm;數據還數據,對於屏風喇叭,大家的印象可能係:價錢唔貴,但推動它的擴音機就唔嘢小!可見屏風喇叭並非省油的燈。

IMG_1575

八爺也不敢怠慢,搬出佢嘅陳年舊機Adcom GFA 5500(之前一直是用First Watt SIT 2的,輸出只有10W),GFA 5500功率200W@8 ohm. 前級仍然是用無源的,訊源就當然是串流啦,丁丁解碼,沒有任何貴線,最貴的,也許是Ringmat墊材罷了。心水清的朋友,大概也可以計算全套機的價值了吧。

IMG_1571

喇叭的擺位跟之前的喇叭差不多,都是相當近皇帝位的,而喇叭大概是在整個長廳的中間,印象中,比之前的喇叭 toe in 多了一點點。 

整晚兩個鐘嘅音樂會,基本上由八爺「打碟」,我只是點播了兩三曲。 

老實講,初初半個鐘有些少唔習慣,心諗:八爺校聲水準唔會係咁㗎!唔通八爺又跟我地玩退燒?求其有聲出就得!又或者佢其實考緊我聽力?(因為有一段日子無寫家訪報告,本來打算寫番篇,今次又可以慳返了。) ⋯⋯

奇怪嘅事終於發生! 

聽咗差不多成個鐘,可能耳仔漸漸「適應」屏風嘅聲音特性,尤其係閉目聆聽,一件件樂器出現返晒,而且輪廓和質感都好好,播古典音樂,場面和低頻嘅表達方式更似現場!人聲亦然,而且喉底更為逼真!不過,咁樣係嚇我唔到嘅,哈哈! 

八爺忽然播首打鼓音樂,類似天下第一鼓那種,我無留意佢播緊邊隻; 

嘩!唔係掛!!!

乜屏風喇叭可以咁抽得㗎?!?!真係嚇到O晒咀!而且鼓皮震動,鼓棍影子,樣樣齊!(須知道,屏風喇叭嘅punch係其「弱點」,好多發燒友因而却步,包括在下;不過,八爺用無源前級,而後級只係200W功率,能夠有咁嘅力度和速度,實在難以置信!) 

過往上八爺府聽嘢,因為喇叭距離皇帝位實在太近,有種壓迫感,所以我多數坐「後座」,但今次聽屏風喇叭,我可以全程安坐皇帝位,舒舒服服咁歎音樂。

八爺今次再向難度挑戰,我就認為十分成功了,事實上,聽佢對聲音的評論,可見佢越聽越鍾意屏風喇叭,到底佢會唔會歸還呢對Magneplanar 1.7呢?



關鍵字:

才子 揚聲器 家訪





相關文章 :